CERITA - poda ni Natua Tua Unang Leas Mambereng napogos

          Sai dipodahon natua-tua do tuhita, asa unang leas. Patudu hagijjang ni rohaon do molo adong leas ni roha dihita. Jala jolma na leas, tung so adong do dongan ni on, ala sude donganna jolma dianggap ditoruna, halak pe gabe mandao. Atung pe rupani dirohaniba, dang diboto nasida nanihataan on, ala didok roha, dang halak batak nasida, jadi tung ni hataan pe ibana dang diantusi i. Alai ima, manang beguaha pe i, unang leas. Husuhuthon ma jo namanggobarhon haleasan ni roha.

        Napuhut do OppuHolong mangalului ngolu di kota na ribur, Jakarta. Nian, nunga piga hali dipasingot amaniHolong, asa unang mangula be ibana. Nga marua daging, sap uban simanjujung. Dipangido amaniHolong, asa holan manjaga pahoppuna si holang ma dijabu. Alai didok oppuHolong, gabe hassit do dagingna molo so mangula ibana.

        Boi dohonon, sahalak na sukses do ibana. Sahalak tokke. Nata pe rupani tokke barang-barang bekas, palastik, seng nang na asing. Gabe tokke ni pamulung ma ibana di Jakarta on. Sian hanunutanna na papunguhon barang bekas, plastik boi ma ibana pasikkolahon anakkonna. Alai, ala diboto ibana do boha posruk na namangalului ngolu, ba molo lao ibana manang tudia, sai mar-bus do. Adong do mobilna na jeges. Alai dang di pakke i. Didok ibana, molo mar-bus boi papunguhon botol AQUA di dalan i.

        Dipamasuk ma tu kattong palastik sude akka boto aqua na dapotsa, jala diboan. Saotik tabba saotik ba boi gabe godang.

Dinasadari, mar-bus ma ibana terminal Senen. Jala songon na somal rupani, ditiop ibana do palastik na birong, inganan ni botol aqua on. Sangajo do ibana jonjong di bus i, asa boi diranapi, atik boha adong botol aqua marpeakan di toru ni bangku i.

“Tareek, beta ma, dang adong be i sewa i…tarik pirrrrr…..” ninna kenek on sian pudi. Huroa halak batak do kenek dohot supir on.

“Litan, litan, Cililitan…” ninna marsurak sian pittu i manjouhon akka panuppang. Sada di jolo sada dipudi.

Piga-piga leleng dukkon mardalan bus on, ro ma sahalak sian kenek i mardalan sian jolo papunguhon ongkos. Dihurtuhi dohot tanganna siamun, na gok hepeng logam i. “Ongkos…ongkos….” ninna kenek on. Songoni ma sian jolo sahat tu pudi.

“Asi nai roha mamereng amattaon neh, nga matua hape ikkon papungu palastik, nga marharukkut tangan i, jala mardalan pe nga mekkat-ekkat”
“Ah, nadibaen-baen do i lae, asa unang marongkos do i. Jalo lae ongkosna, didia dapot na pere-pere di portibion”
“Sobbu ma songoni lae, sahalak na do, asi roha” ninna siJamurhing, kenek na papupungoh ongkos on.
“Dang adong i lae, paula-ula ma dipanengel-nengel i, ai mamora do di Jawa an, nga hea hu ida, akka pargabus doi, jalohon ongkos ni i, molo dang dilean asa hupaturun” ninna siJatiolhas kenek na jonjong di pittu jolo i.

“Pak,..pak…ongkosnya pak, baru keluar pool ini, belum dapat setoran” ninna mandapothon oppuHolong.

         Didadap oppuHolong sakku ni bajuna, dilean ma ongkosna. Huroa dang sangka roha ni kenek on, nahalak batak OppuHolong, dibereng sian pardompahan dohot ulaonna.

        “Ai na dipanengel-nengel do, paula-ula doboan-boan palastik i, asa asi roha, paula-ula dang dibereng nga pinapungu ongkos” ninna siJatolhas muse, mandok tu siJamurhing, huhut dilean hepeng na jinalona sian oppuHolong.

          Didok oppuHolong ma “Dang na hupanengel-nengel lae, jala dang huharaphon asi niroha sian hamu, hagarar au do ongkoshu, gijjang ni rohami, kenek dope ho nga langitmu langitan…” tarmuruk ibana, huroa dang tartahansa be dang mandok hatana.

          “Bah, ai halak batak do pe hamu, sattabi ma oppung, sala ma au dihatakki, hurippu nakkinon dang batak hamu, marga aha do ho oppung” ninna siJatolhas huhut marsiberengan nasida nadua.
       “Dang adong marga-margana, jala dang oppungmu au, nandigan anakku manubuhon pahoppu songon ho na roha, leas roham mida napogos” ninna OppuHolong.